17 Jan 2015

鄭耀棠以港區人大代表身分北上開會後放風，話人大副委員長陳昌智批抨，提出白票守尾門既人「戇居」，以及中央會堅定支持梁振英依法治港，更表示「支持梁振英就等於支持中央」。反過來說，就是不支持梁振英，就等於同中央過唔去。如鄭耀棠所說，中央好少將自已尊貴高不可攀的地位押在一個只屬九品芝麻官的香港特首身上。去到咁盡，無非表明中央的確無計可施，用盡所有斯斯文文假裝尊重一國兩制的統戰方法都唔夠票，唯有出言恐嚇，你班立法會議員夠膽投反對票，以後番大陸一定比人裝沖涼。

去到咁盡，當然苦了一眾立法會議員，你天朝大國位位大官都是奉天承運，當然唔使理班蟻民，但選立法會係要靠市民一人一票的。當日中央一意孤行推出最保守方案，要小圈子選委會過半數票支持出閘，仲要話市民有得揀有得參與係一大進步（點解過半數票選出，仲會有兩三個候選人？真係愛因斯坦都諗唔明），搞到幾萬人上街佔領抗議，礙於官威又唔肯撤回又唔改動，而家個學者推白票守尾門等大家好落台，你又話人戇居，重要議員賭上政治前途幫你抬轎，好強人所難囉。

中央成日話香港人民心未回歸，又話擔心年輕人有離心。計我話，呢班在威權社會中長大，一直受"絕大多數" 人民緊緊圍繞的黨和黨中央干部根本就唔明，佢地威權主義式的意識形態和高高在上的傲慢官腔，在文明開放的社會顯得如何粗暴拙劣如何惹人反感。而家無可否認權力的而且確是來自中央而非人民，但歷史表明，任何倒行逆施的政府總有被推翻的一天。睇下前全國政協委員兼前愛國分子劉夢熊，以前愛國保皇不遺餘力，一旦無利益落袋，即刻變身積極反梁，仲要同政改三人組辯論，話人大8.31決定係「隻手遮天」，「亂搬龍門」咁話。 當國家經濟變差，中央再提供唔到咁多利益，香港會多幾個劉夢熊？至少現在我就想到一個女版的。

葉劉秘密訪京後引述：中央仍望通過政改
【政改諮詢】劉夢熊下戰書邀政改三人組辯論